台灣組合S.H.E成員Selina前年喺內地拍戲被燒傷，兩位姊妹Ella同Hebe一直好支持佢，家Selina傷勢已有好轉，聽講S.H.E會喺今年底合體出新專輯。S.H.E三位成員感情要好，日前Ella同Hebe喺台灣出席完一個頒獎禮，即帶埋三隻愛犬同幾位女同事去接Selina，然後一齊去咗桃園縣一間餐廳食飯。點菜後，一行人同幾隻狗仔走到餐廳外嘅草地玩。素顏嘅Selina着短袖衫短褲，完全唔介意露出壓力衣，佢仲跳跳紮圍住啲狗仔影相，但可能皮膚仲增生緊，Selina有時都忍唔住痕。其間有唔少粉絲認出S.H.E，要求簽名同合照，佢哋來者不拒，最後玩到夜晚近十點先走。
Ella夫失業
不過，Ella呢輪都應該有啲心煩事，因為佢老公賴斯翔就嚟失業，有傳賴斯翔升職後令公司業績大倒退，公司又嫌佢哋婚事太高調，賴斯翔亦承認9月15日將離開做咗10年嘅公司，但就話離開係因為自己有新計劃。
撰文：葉雪
