蘋果同三星產品觸發嘅侵權官司，正進行得如火如荼，蘋果剛剛喺美國打勝仗，三星要作出10.5億美元賠償，蘋果仲要提出禁制令，要求三星某幾款手機唔准再喺美國賣，三星就揚言上訴到底。唐牛就覺得，企業互相競爭，得益嘅永遠係消費者，皆因產品價錢同質素，喺競爭之下，只會更平及更好。講開抄嘢，專做紙巾嘅維達（3331）噚日宣佈，會進軍紙尿片同衞生巾市場，擺明車馬同龍頭嘅恒安（1044）爭一日之長短，無他，紙巾嘅毛利率只得三成，但衞生巾就去到六成樓上，難怪上半年恒安毛利率有44.2%，維達只得31.3%。不過維達講明，新業務要到2015年先有貢獻。光大國際（257）早幾日宣佈折讓8%配股集資12.4億元，復牌後最多回落近6%，但穩守批股價3.58元，噚日收報3.79元，升0.8%，彭博綜合券商預測市盈率13.9倍，屬合理水平，睇圖3.90元為短線阻力，戰友可在3.70至3.90元炒波幅。唐牛