新世界發展（017）創辦人鄭裕彤連續12個交易日有秩序地減持澳博（880），另一邊廂，市傳銀娛（027）基金股東前日沽貨，係有人主動想攞貨，仲攞咗好多。照咁講，連睇大戶動向都捉唔到路！彤叔係澳博非執董，有600萬股認股權，一直冇乜動靜，今個月10號開始無端端換股沽貨，最初10萬10萬咁沽，近期就5萬5萬咁沽，好有秩序，至今累積減持84萬股，套現1314萬。區區千零萬對彤叔嚟講算得乜，佢舊年喺澳博攞嘅人工都有2140萬啦，做乜咁揚沽貨呢？相信只有佢老人家先知點解。至於早兩日俾英國基金股東Permira減持嘅銀娛，市傳有個活躍喺濠賭股嘅投資者，主動要貨，咁對方先順便配股，仲話呢個投資者接咗好大批貨，令人覺得有人沽亦有人大手買。查實個市咁靜，好難捉路，散戶都係企埋一邊睇戲好喇！