續談上周英國之旅，除有機會入奧脫福睇波，對於陳瑋樂及陳柏熹兩位香港小將來說，感受最深該是到曼聯的卡靈頓訓練中心，與其青年軍拍跳及測試體能；更可與尹佩斯、卡域克等一線球星擦身而過！瑋樂直言，好似同曼聯一隊一齊受訓咁high！
只可惜訓練中心守衞森嚴過白金漢宮：在白金漢宮都可隨處影相，在卡靈頓則連相機也不可隨便拿出來。
我曾到過皇馬、巴塞等頂級球會的訓練基地採訪，相比之下，曼聯的卡靈頓守衞確係犀利。我在巴塞基地停車場，見恩尼斯達驅車離去時，都可任影唔嬲；但在進入卡靈頓一刻，打扮像FBI的職員講明整個訓練中心嚴禁拍照，只有兩位小將在室內體測房間時才可拍攝，還勒令我們把相機收入袋內，驚死部機識射子彈咁。
全程受嚴密監控
說時遲那時快，養傷中的基斯史摩寧便撐着拐杖在我們身旁出現！其後，當兩位小將受訓時，我這些「閒人」只可被安排在一密室內等候，透過百葉簾的縫隙，見到尹佩斯、史高斯等逐個經過，到停車場取車離去，可惜全程受嚴密監控，想偷拍？No way！我覺得自己似被軟禁咗半個鐘。
球會當球星係嚿金咁保護，其實很多球星本人卻好易話為。拍攝完成後，我們乘車離去，在閘口被塞住了，原來菲爾鍾斯停了在閘門，調低車窗為閘外守候的球迷簽名和合照，原來唔入基地影得仲多！真激死！
文：方柏翹
now足球評述員