倪匡 訪談通電話，倪匡總是笑笑口說勞氣話，播放率最高依次為「香港一定死㗎，我睇唔到有咩辦法可以唔死喎！」、「我30年前已經講㗎啦！」、「共產黨靠得住，豬乸都會上樹呀！」與2012年梁振英上台後才驚覺土地被割、西環治港、校園赤化的儍豬豬香港人比，年輕時受盡共產黨迫害、輾轉逃亡來港的倪老大，對時局的判斷似乎win硬無得輸：他筆下的衛斯理系列之一《追龍》，預言一個東方城巿被巨龍吞噬，是無法改變的命數，這本書出版時，是回歸過渡期的1987年。沒錢移民、後生遙遙的香港新一代，看完倪老大這本著作，頭上準會烏雲一抹，擔心中共永恒不滅，至於無窮之世，要逃出中共魔掌，唯一方法只是集體自殺。一直說對香港前途悲觀的倪老大，談到這裏卻頓了一頓，似乎不想將一眾後生推向絕境──要戰勝共產黨不是沒有辦法，人性本質就是最強大的武器。「人嘅天性會戰勝共產黨，因為共產黨係違反人性，違反人性嘅嘢，不能久存，從長遠同歷史嘅眼光，所有強權統治最終都會覆滅，無論佢當時幾咁強大，最終都係趨於死亡。」雖然這次倪老大沒有感應，無法預知中共何時certified，但他相信死亡始終會出現，「滿清咁腐敗，孫中山都用咗十幾二十年先成功，但蘇聯共產黨垮得幾快！你唔知㗎，佢哋（人民）嘅反共情緒『好犀利』，一、二、三就推翻架警車啦，我判斷中共政權，已經應該維持唔到，垮台嘅因素已經成熟，只係等出個好出色嘅領袖，同埋老百姓大規模反抗。」「總之人心方面係最緊要，大家一邊又抗共，一方面又認同佢個政權，咁佢嘅死亡自不然係遲緩㗎嘛。」他形容現時是中共最腐敗的時候，「如果老百姓反抗，佢哋走夾唔唞呀，嗰啲中央委員百分之七十都有外國護照，家刮得幾多得幾多，係最腐敗嘅時候，係從入面開始腐爛出嚟。」倪匡說自己老了，甚麼都不怕，「你哋後生就麻煩啲，我返原始嘅地方啦，好多嘢大家放長雙眼，你哋睇得到，我睇唔到㗎喇，我睇到下年巴西足球都好開心，總之共產黨垮台，香港就得救，香港跟隨大陸走，以前咪有句名言，『中國好，香港好』，就係咁解，哈哈哈哈！」 《蘋果》記者 張嘉雯