國泰航空（293）前大公關莊偉茵下周一去中電（002）報到，估唔到走咗冇耐，佢位副手，即企業傳訊總經理楊志剛（CK）都要調走，聽日開始轉做常務總裁朱國樑嘅特別顧問。CK喺國泰做咗兩年幾，之前喺科技大學、九鐵、貿發局等機構做過，佢為人比較低調，莊偉茵一走，佢就調去另一個崗位，難免令人懷疑係新老闆、即係時事評論員周融太太張鳳婷嘅意思。之但係，雖然話新人事新作風，但照計周太都係經驗老到之人，唔使咁快手起刀落，做得咁明顯啫。唔通係其他人嘅意思？定係真係咁啱得咁蹺呢？接替CK嘅梁皚亭來自港龍，之前係港龍機艙服務總經理及國際事務總經理，早兩年港龍爆發空中服務員工潮，佢就係負責同工會講數，同埋出嚟解畫，轉做公關應該難佢唔到。