生肖屬豬嘅前金管局總裁任志剛，9月初65歲大壽，華華最近同呢位前金融沙皇傾開偈，佢話自己一向好少慶生，生日通常都要開工，周圍飛開會，即使09年退休後亦無變，今年先有機會同太太Miranda一齊飛去美國西岸自駕遊，當慶祝。
休息多啲 工作少啲
任總話，以前做監管工作時，差唔多年年生日正日都公務纏身，事關9月份，十次有九次都要出席巴塞爾委員會等行長級國際會議。退休後，情況差唔多，皆因佢應承擔任唔少金融機構同企業嘅獨立非執董，所以生日都係搭飛機出差居多。但佢今年終於可以忙裏偷閒。佢話，下個月初經美國赴墨西哥開會後，有個幾星期空檔，已計劃順道飛返美國西岸，同太太Miranda一齊自駕遊，沿西岸地區邊揸車邊欣賞風景。任總近年去親美國多數開會，太太就十幾年冇去過西岸，兩位今次正好可以拋開俗務，投入大自然美景，sweet sweet啦。至於生日願望，都係最緊要健康，任總亦希望生活作息，工作安排，可以更加均衡，休息多啲，工作再少啲。自從6月中發表鴻文檢視聯滙後，任總就冇再就呢個「學術議題」進行第二回分解，佢透露，近日都係忙於中大全球經濟及金融研究所嘅授課事宜咋。李華華mailto:[email protected]