正所謂你有張良計，我有過牆梯。上周才講緊豐田86與富士BRZ兩位同根生兄弟正式埋牙廝殺，鬥得難分難解，今周86就以一部樣更辣、聲更惡的重口味Sport Plus版應戰。邀請曾任FRD方程式賽車、接觸改裝賽車無數的Donny試車，他大讚86無論外形、聲音定操控，都好有跑車Feel。
記者：許維雅
攝影：潘志恆
模特兒：Hidy @GME
原裝大尾翼唔怕捉
唔少見過試過豐田86的車迷，第一樣會諗的都是改裝，嫌普通版86唔夠辣？可以考慮這部車價貴$23,450的Sport Plus頂級版，加裝了全套車身擾流包圍、一隻大尾翼及大口徑雙出死氣喉等跑車配件，襯落貼上雙白間拉花的金屬橙色車身之上，的確令人刮目相看。加埋備有座椅發熱功能的真皮椅，Options值唔值二萬幾呢個差價雖然見仁見智，但肯定尺碼咁誇張的尾翼由原廠打造就一定唔會俾交通警捉，谷出有型跑車味之餘又唔使提心吊膽。講開改裝，找來前FRD方程式賽車業務發展部經理虞天洛（Donny）試車，雖然在FRD工作三年見盡不少大馬力賽車，但偏偏對只有200匹馬力的86有興趣，曾經幾次提出試駕此車：「大家因為《頭文字D》，都對86變得好有興趣，我都想試吓新世代的86有咩唔同。」先談外形，Donny亦覺得86賣相不俗，「雖然同以前AE86完全唔同，但新86的感覺有另一種味道，而且Sport Plus版嘅跑車套件都改裝得幾好，幾有型！不過，畀我揀的話，尾翼如果可以細番小小會好啲。」
街飛不如落場飛
於烏溪沙附近高速公路周圍飆，試盡86的力量、入彎操控及懸掛穩定性等設定，Donny第一句評語：「幾好，幾有跑車Feel。以兩公升引擎來說，試揸完發現手感唔錯，操控性靈活，加埋啲引擎聲，畀到人有跑車嘅感覺。」他亦欣賞它的六前速自動波箱：「佢嘅加減波反應不俗，跟手波車嘅靈活性差不多。轉數太高時，錶板仲會有顯示提你轉波，呢啲就係新世代車嘅優點。總括嚟講，呢架車都幾好玩。」雖然唔少人話力量唔夠喉，但Donny卻出奇地理性：「其實喺香港揸已經好夠，香港根本無路畀你飛，要飛不如落場飛。」以往經常在內地舉辦賽車，包括上海賽車慈善明星賽，現職又是寰亞藝人部高級經理熟識娛樂圈，問到邊位藝人駕車技術好：「吳家樂、錢嘉樂啦！女仔代表有李珊珊，佢入彎各方面都好有概念。」那同屬愛車之人又是他旗下的余文樂呢？「佢都想學吓操控大馬力車嘅技術，遲啲有機會都想帶佢返內地賽車場試吓。」
豐田86 Sport Plus
引擎：1,998cc水平對向四汽缸
馬力：200PS/7,000rpm
扭力：205Nm/6,400-6,600rpm
傳動：六前速自動波連+/-，後驅
售價：$388,850
查詢：2305 4555（皇冠車行）