丹麥「甜心」禾絲妮雅琪，自從上年同北愛高球手麥艾萊拍拖之後，成績每下愈況。周二美網首圈面對世界排名96嘅比古，連一次破發都做唔到，直落兩盤2:6出局，今年4大滿貫終於全軍覆沒。禾琪呢一年成績咁曳，極有可能打唔到年終賽，今次真係「瘟仔」瘟出禍！
呢位前「水貨1姐」，喺周二「紮住上」對羅馬尼亞嘅比古，極速81分鐘就畀對手K.O.咗，繼溫網後又再首圈收工。賽後佢話好想打好啲：「入得球場，梗係想以最佳水準比賽，無論會發生咩事都好。我嘗試過㗎，不過我冇打得特別好，仲成日出錯。」仍未贏得任何大滿貫嘅佢仲話：「喺呢啲係人都想打得好嘅大賽首圈出局，真係好不幸。」好多運動員拍拖、結婚、生仔都照有好表現，係得你一個越打越霉，又真係幾不幸。希望佢唔會迷信，去賴男友唔「旺妻」啦。
禾麥求戀期成績空白
上年7月現年22歲嘅禾琪同麥艾萊「撻着」，兩個人8月仲喺耶魯大學激嘴確認戀情。只羨鴛鴦不羨仙嘅禾琪呢13個月嚟，只係喺上年美網同今年澳網入到4強、8強（見附表），今年成年都有傷在身，搞到兩年「水貨1姐」生涯終結。
不過令球迷感到無奈嘅係，「甜心」佢場內冇成績，又唔專心養傷，仲要場外喪玩！好似今次美網開波前一日，禾琪仲要同麥艾萊去彈琴happy！其實，佢可以專心比賽先，完咗再同周五喺波士頓比賽嘅男友去玩都唔遲呀。呢位曾一次打入大滿貫決賽嘅丹麥女將，今年4月仲走去學人做歌手，出咗首歌叫《Oxygen》，6月又出個人內衣品牌，副業仲忙過正職。
年終賽隨時唔使預佢
家禾琪畀「中國金花」李娜爬頭，喺WTA世界排名跌至第9位，照現時嘅排名嘅話，即係喺10月土耳其舉行嘅年終賽只會係後補，最多只可以趁人受傷，戥腳打小組賽，打得幾好都唔可以入4強。拍拖冇所謂，不過比賽時一定要專心囉。
「禾麥戀」後禾琪大滿貫成績
2011年
賽事：美網 成績：4強
2012
賽事：澳網 成績：8強
賽事：法網 成績：第3圈
賽事：溫網 成績：首圈
賽事：美網 成績：首圈
資料來源：WTA官網