狼振英，唔好話八方冇你心，雖然八方冇份亦唔會投票支持你做特首，但都好記得，今日係農曆七月十四日鬼節，係閣下嘅農曆生日，所以專登悉心挑選咗三份實用禮物，向58歲嘅狼英賀壽。收禮喇！
誠實豆沙包
狼振英未夠六十歲，八方唔請佢食壽包喇，送上誠實豆沙包仲實際。呢隻包有咩用？相信毋須介紹。家陣狼英單僭建醜聞都未講清楚，與其一個大話冚一個大話，成日要嘥心機搵藉口狡辯，不如隊個誠實豆沙包，一鋪過講真話，咁咪唔使煩囉，八方係咪好細心呢？查實狼英班爪牙，都好需要誠實豆沙包㗎，可能狼振英都要分番一半，畀個大話班子一齊享用。但八方要提提佢，誠實豆沙包嘅效力得30秒，記住每次答問題前食定幾個，唔係講講吓又失憶就唔好啦。
照妖鏡
相傳照妖鏡，除咗可以令妖魔鬼怪露出原形，亦可以起到鎮攝作用；鬼節出世嘅狼英，當選以嚟原形畢露。選舉時話要搞港人港地，選後又因為怕咗大孖沙而縮沙；呢頭話會捍衞核心價值，嗰頭就做盡踐踏港人底線嘅行為。企硬要推洗腦國民教育，就知佢幾咁唔重視民意啦。
八方恐防狼英俾佢嘅擦鞋梁粉兵團重重包圍，都唔知自己變臉變得咁恐怖，所以特登送上一面照妖鏡，希望佢得閒都攞出嚟照一照；睇到自己嘅狼相後，反思一吓係咪應該從良。
防毒面具
狼英上任之初，個個禮拜都落區，話要履行競選承諾，八方眼見佢次次落區，都有成班熱情嘅請願人士等住招呼佢，而且招呼佢嘅人越嚟越多，恐怕狼英遲啲再落區，護主心切嘅禿鷹會出動埋巨型胡椒噴霧為主子護駕。刀劍無情、槍炮無眼，胡椒噴霧同樣無方向；一旦「被出動」，狼振英都可能會遭殃㗎。八方好擔心，若然狼英因此被噴到，有啲唔想同市民作對、慘成政治工具嘅警察叔叔都罪該萬死，所以八方送定個防毒面具畀佢落區用，唔好令咁多人無辜受害。
mailto:[email protected]