味千（538）豬骨湯事件一周年，公司都未恢復到元氣，由舊年中到家，每個月同店銷售至少跌20%至40%，完全見唔到有明顯收窄的趨勢。管理層同分析員講，8月同店銷售終於止跌喇！但唔係因為公司做多咗生意，只係8月開始同比基數好低，即係數字遊戲嚟架咋！其實銷售只係返到出事前80%左右。將來睇味千，銷售增長唔係重點，margin先至緊要。憑乜野賣一碗拉麵可以有66%毛利率呢？出事前，打住「日貨」招牌，定價30幾50蚊一碗麵仍然大把人食，大家自我感覺良好。但當客人發現豬骨湯原來係內地的日資工廠量產製作、營養含量被誇大了n倍，加上公司唔多願意同傳媒溝通嘅態度，令事件發酵到不可收拾。家內地經濟唔多好，聞說老麥、KFC、pizza hut等，已經密集推出特價餐，15至30蚊人仔有交易，下午茶去到8至12蚊。味千要面對的壓力唔細。味千今年上半年，宣傳廣告開支佔收入2.6%，喺一個危機時刻咁嘅投入力度夠唔夠，留返畀投資者自己評論。雖然生意唔好，味千分店仲淨增加了10間，現時672間分店當中，有六分一係蝕緊錢！仲有唔少係新開無耐，要整固似乎都仲有排搞。海迪