媽模陳靜儀（Mia）、連詩雅、關楚耀同周秀娜男友陳偉成（Avis）等，前晚到旺角鬧市宣傳新戲《喜愛夜蒲2》，吸引大批市民同龍友圍觀，幾位演員仲喺鬧市扮戲中倒後行嘅情節，但係電影公司冇安排保安維持秩序，搞到有記者同班紋身後生仔發生爭執，有記者即場報警。
Mia搏殺拒封胸
一身性感打扮露事業線嘅Mia，被問到擔唔擔心俾人鹹豬手？佢話：「係有少少混亂，好彩有啲男演員保護，唔擔心，但係如果有保安會好啲。」不如索性收埋事業線免惹危險？但Mia話：「咁又唔會，家係搏殺期，唔收得住。」連詩雅都話唔知現場冇保安，覺得係有呢個需要。問到導演錢國偉點解冇安排保安，佢話：「呢啲唔關我事，唔係我管，不過都會檢討吓。」
同場嘅陳宛蔚噚日喺微博自爆前晚亦俾人掃胸，身為男友嘅錢國偉指責王維基電視台嘅藝人管理部，炮轟佢哋冇人照顧已簽約嘅陳宛蔚。
Mia同Avis噚日到新城接受訪問，佢哋以銀幕情侶有好多合作機會，Avis怕唔怕女友周秀娜唔高興？佢話：「唔好講到佢咁小器，我哋互相信任。」Mia俾人話有新男友，佢大方承認話：「佢係我男朋友，拍咗成年，佢係圈外人，唔想提咁多。」
