【旺角】
劉德華同鄭秀文（Sammi）前晚喺旺角行人專用區開工，拍杜琪峯套新戲《盲探》。前晚7點幾Sammi首先拍攝，劇情講佢去咗間台式雜貨店掃咗兩大袋貨喺街行，咁樣已經吸引過百人圍觀。
到9點半華仔現身，工作人員set好晒位先敢叫佢落車，但因為有太多人圍觀，足足搞咗5分鐘華仔先埋到位，激到杜琪峯發晒脾氣鬧班工作人員。
400人圍觀
前晚場戲講演盲人嘅華仔，喺行人專用區揸住盲公竹行來行去，個鏡頭拍咗一粒鐘有多，而華仔同Sammi冇對手戲。拍完場戲，圍觀嘅人多咗好多，華仔、Sammi同林家棟就走入帳幕避一避，杜琪峯一於少理，喺度食煲仔飯。華仔離開時，現場已聚集超過400人睇熱鬧，工作人員要圍成人鏈保護華仔上車。到Sammi離開，人群仲未散晒，接佢嗰架車要成15分鐘先駛到入現場，Sammi就吹住風扇等，佢話好耐冇去旺角，今次見到啲街坊好開心。
採訪、攝影：朱志聰、羅德光、黃曉程
