顧問T又自大連來港，走到陸羽等我地上去飲茶。君來自大連，自不然有人問起薄谷開來，顧問T話：「根據內地一般情況，谷女士兩年後過咗死緩期，就會獲判有期徒刑二十五年之類，再等兩三年，谷女士既然現在精神已經有問題咯，法院話佢患有精神障礙，控制能力削弱吖嘛，那麼到時距離犯案時間已有六年，谷女士健康不佳，精神病加深，大可保外就醫，就此了結。」講到好似已經寫好劇本，但又唔知點樣批駁，只好信佢，畢竟顧問T住在大連，對內地情況比我地了解得多。顧問T最近為咗幾位客戶嘅生意（人地請佢做國際事務顧問，與老外打交道），到北美洲走咗一趟，尋求出口訂單，去到加拿大搵一位大客，問Chief Buyer（買手）：「阿哥，你過往向我公司訂貨，一萬件，兩萬件咁買，最近點解冇晒單呀，係我地啲貨品質不佳呀？服務不佳呀？請多多指點，我地一定改善改進！」對方答：「同你咁熟，無謂講門面話，你地啲貨素來唔錯，我地好滿意，但零售市場不景，我都冇辦法，以前我俾開八十人民幣一件嘅貨，依家肯唔肯賣四十元一件吖，我知道你地實唔制嘅，所以費事落單，無謂花時間！」顧問T話四十蚊一件，蝕埋老本都唔掂，不如同買手去飲杯酒，講吓來季冰上曲棍球好過，費事講生意。滙豐發佈八月份PMI（中國製造業採購經理人指數）初值，回落至47.8，創九個月新低，就係反映出內地製造業不景，其中新出口訂單指數嘅八月初值係44.7，更係41個月新低，與顧問T到北美洲行一轉，兩手空空回來之慘情，相當吻合。四年前之四萬億元刺激經濟方案，造就不少人成為大富豪，今年唔會再搞喇啩？即使在08年之前，投資房地產已幾乎萬試萬靈，不少人漏夜發達，以錢搵錢。摩根士丹利房地產基金前任中國區負責人Garth Peterson在08年被大摩解僱，最近被控在華行賄罪成，觸犯美國「反海外腐敗法」，在美國被判入獄九個月。佢在電視訪問自爆，在中國工作時，夜夜笙歌，主要活動係smoking, drinking and womanizing，慣晒客戶用名酒美女招呼佢，最豪一次，一晚飲酒20萬美元！問顧問T有冇咁「幸福」被招待，佢嘆一聲：「一我唔係鬼仔，二唔係大摩伙記，邊有咁多采多姿！」