曼聯前鋒朗尼喺上場聯賽，俾對手踢到大髀爆開，有消息話可能要休息兩個月；朗尼都好照顧擔心自己嘅球迷，喺Twitter度發咗張相等大家安心啲（圖）。相上面嘅朗尼好悠閒咁坐喺梳化度，仲豎起手指公「讚好」，而佢着嗰件T恤上面寫住嘅拉丁文，意思係「傷口產生更大勇氣」；睇嚟佢都唔太擔心自己嘅傷勢喎。朗尼仲多謝球迷關心同支持，話希望傷勢盡快好番。