有人蒲吧鍾意勁嘈勁熱鬧，有人就喜歡三五知己談天說地，咁唔通要人哋就住嚟猜枚咩？咁又唔使，只要酒吧分清楚區域，咁就唔使擔心順得哥情失嫂意啦！ 文、攝：吧少即如呢間「啡酒屋」，就劃分咗三個區域，喜歡靜局嘅坐充滿西餐廳風格嘅室內「溫馨區」，整埋支蠟燭，情調十足，蒲到蒲得有格調。但若然想玩得奔放啲嘅，咪出去「露天區」囉，猜枚劈酒，嗌到拆天都唔使擔心有人報以詐型眼光。
此外，仲有個「睇波區」，設有特大投射式屏幕，啱晒一眾球迷。大家一齊靜觀球賽，一旦有入球或者射極都唔入，又成大班人同一時間喝采或者發出噓聲，嗰種萬眾一心嘅感覺，真係好似去現場睇波咁High㗎。同一個場，就滿足到三種完全唔同需要嘅人客，你話幾好呢！至於我，就索性一晚玩晒三種Feel。點玩法？嗱，先去「露天區」同人劈到飛起，到咁上下醉醺醺嘞，啱啱夠鐘睇波，就行過去「睇波區」霸頭位，嘆完波，再飄番入「溫馨區」，搵個靚角落趴喺度瞓番覺，咁又一晚嘞。不過，有時未必有波播，咁咪多啲時間搵機會識吓周圍啲靚女囉，反正呢度客路比較廣泛，斯文靚女有，潮型索女更多的是，大把目標啦！
啡酒屋
地址：深圳市福田區民田路城建購物公園北園電話：0755-82908006營業時間：11:00am-3:30am酒水收費：啤酒￥30/支起、雞尾酒￥45/杯Happy Hour（11:00am-8:30pm）啤酒買一送一
