催谷咗一輪嘅4K超高清面，暫時尚屬富貴級玩意，而安橋將旗艦級擴音機NR5010，率先加入將視訊升頻成4K嘅功能，能將1080p畫面上嘅臉部皺紋及衣服質料，更清楚細緻重現，機價兩萬多啲，算係超高清入門玩法。
記者：陳國輝
攝影：楊錦文
模特兒：Fiona@Zmodel
一㩒升頻 皺紋現形
市面上雖然未推出4K影碟，不過已有攝錄機同YouTube片支援4K超高清格式（4,096×2,160），除咗咁，仲可透過硬件升頻玩到4K。好似安橋最新嘅NR5010，內置第三代QDEO晶片，專責處理將1080p升頻成4K訊號，只需在Menu一按「4K Upscaling」，Blu-ray影碟立即由1,920×1,080，跳升為4,096×2,160輸出！雖然唔係真正超高清，但升頻後嘅效果，明顯比原生1080p細緻咗不少，情形就如藍光普及前，發燒友鑽研升頻DVD一樣，唔算好勁，但都叫進入咗4K境界囉。
亞洲高清協會主席李柏權認為，現時只有4K拍攝器材，但影碟、顯示器就完全跟唔上，令「4K Upscaling」變得意義不大；而影音天地Danny則表示，有4K片源都要有4K顯示器襯番，而且售價不菲，好似現場試播嘅SONY投影機VW1000ES咁，價位接近20萬元，絕對係富貴級玩意！
三火牛各司其職
除咗靚畫，音色固然係安橋自家強項，齋睇平實造型，佢同中階、入門擴音機比較，似乎分別不大，但原來外殼採用分離式鋁合金物料製造，好處唔單止硬淨，更可防止諧震，令音色更清純、更乾淨。再拆開機殼一睇，你會發現火牛嘅佈局都唔同晒，一般中階AMP採用方牛推動，但NR5010就改用一隻大環牛及兩隻方牛，作用係以獨立方式來處理擴音、視頻同埋數碼音頻三部份，令運作更具效能、表現更穩定。另外，火牛與底板之間用一塊中板作分隔，音頻自然唔會受電流干擾，能達到降噪作用。
