復古熱永不死！無論係古董，抑或仿古傢俬，都可以為屋企加添品味；好似每個人屋企都一定會有嘅櫃，如果普通款式已經再不能滿足你，又想把雜物細緻分類的話，有沒有想過把中藥店先見到嘅百子櫃帶回家？家仲有經改良嘅新款百子櫃，有不同顏色選擇外，更可以靈活運用，實行任你擺之餘，又可以為你嘅屋企增添不平凡嘅復古味！
記者：胡靜雯
攝影：蔡家輝、陳盛臣
模特兒：Kara@Pure Models
百子櫃源自華佗
百子櫃喺藥材舖就見得多，但未講佢點入屋之前，都要講講最早期嘅百子櫃係點嚟；相傳早在三國時期，名醫華佗因幫了一位布衣木匠治療腳傷，木匠為咗答謝華佗，眼見他的藥只放在許多大小不一嘅布袋裏，好不方便，於是木匠便為華佗特製了一個差不多有四百格的中藥櫃。
百子櫃有咁多格，擺放物件嘅時候當然要有規律，如果唔係醫師們點能夠在短時間執藥呢。其實，不同嘅中醫師在編排上都不盡相同，只要方便自己就可以。但他們普遍都有一個規律，就是會按照中藥配方嘅原則、特性和品種來擺放。最常用嘅中藥通常都會放在中間一排；質量較重的會放在底層，較少用或質量輕的藥會放在較高位置。
櫃身用料方面，多精選材質較強、擁有防病蟲功效嘅東北樟松，木質有韌性，脫水烘乾後需要陳放一年後才可繼續加工。抽屜則採用桐木實木，配合傳統入榫工藝。整體顏色光亮，原木紋理清晰透明；直接磨光、噴聚脂漆，不貼木紋紙。
榆木古董櫃夠味道
要尋找最原汁原味嘅百子櫃，最直接當然在古董傢俬店。專營現代實木傢俬嘅Natural High，除咗有自選訂做服務外，原來仲有分店專營古董傢俬。店內所有家品都係由老細到國內不同地方親自搜羅；而店內就有兩座百子櫃，由於購入時間已有一段日子，所以連老闆也忘記它們嘅出產地。
兩座傳統百子櫃都差不多有一個人咁高，不過不同地方出產嘅百子櫃會有不同格數。木材雖然係密度較低嘅軟身榆木，但本身紋理清晰，硬度與強度適中，加上木材彈性好，耐濕和耐腐；只要買回來後作多番清洗和上漆，小心保養，例如有水迹就立即拭去或在冬季乾燥的房間中，使用加濕器避免家具乾裂，就能保持老榆木嘅「味道」。
店中嘅百子櫃，結構也當然沿用傳統榫卯工藝所建造，經過嚴格乾燥的榆木不易裂開，足以抵禦潮濕和乾燥。所以，百子櫃桶即使沒有現代家居櫃桶常用嘅滑輪裝置，也不會出現開裂和變形的情況，櫃桶依然拉得順暢！
如此古色古香嘅百子櫃當然要配合恰當的裝修啦！由於櫃身色調偏向深色，盡量避免使用冷調或透明感重嘅材料，如玻璃；多用一些仿古磚、木材或紅磚等材料，混搭天然質地嘅布藝，如麻布或竹具，配合陶瓷、藤器等飾品，自然讓空間充滿自然樸實感。
100年樑柱環保回歸
無可否認，以前嘅屋企夠大，可以擺放如古董百子櫃般龐大家具；不過，就算幾實用都好，得嗰幾百呎嘅屋企真係好難容納到。有見及此，專營仿古傢俬嘅Old Shanghai就特意設計及改良百子櫃，推出不同尺寸、格數和顏色，可靈活運用外，Size細咗更容易入屋！
負責人Andy就話佢哋取材自山西、山東嘅古老大屋上嘅樑柱，然後舊木新做。由於榆木家具歷史悠久，從晚清時期都一直生產，而山西、山東嘅榆木供應量夠穩定，木材夠「資歷」，全部都有100年歷史以上，夠環保之餘，也有品質保證：「舊木通常需要擺放一段較長的時間，而且經過木溝爐烘焗，木材經過長時間的存放的話，通常已經定形，收縮的機會及程度會較低；我哋會在木材上塗上漆油，保護本身嘅品質和色調。然後，參考古董家具嘅設計，加以改良令百子櫃更具實用價值。」
a.Natural High Design Ltd.（3160 8990）
b.Old Shanghai Ltd.（3527 3135）
