幾經擾攘，莫迪歷終於喺日前加盟皇家馬德里。呢單交易嘅轉會費，據講高達3,000萬鎊（約3.7億港元），搞到無端端有間波斯尼亞球會走出嚟話要分杯羹。話說莫迪歷喺18歲嘅時候，被薩格勒布戴拿模外借去波國辛連斯基；歐洲足協就有個「團結機制」，即係前屬球會可以收番轉會費嘅0.5%，作為以往青訓嘅賠償，所以呢間波斯尼亞球會有機會執番15萬鎊。