市傳蘋果9月12號推新iPhone，數碼通（315）前日又話延遲到9月11號先全面推4G，令蘋果粉絲充滿暇想。有報道就話，數記近日向快將約滿嘅客戶提供iPhone 5套餐，簽約兩年，下個月就可以以「零機價」出iPhone 5。華華都想第一時間攞住部iPhone 5周圍行，於是即刻打電話去數記客戶服務部，以就快滿約兼高用量客戶身份問吓係咪有套餐。
身為夥伴要保密
點知聽電話位姐姐話：「暫時未推出iPhone新型號嘅月費計劃喎，（咁幾時有？）Apple一日未公佈，我哋唔會有時間表，要有機先有個plan。」咁究竟數記從冇推過套餐，還是被人煞停呢？聽電訊界老友講，蘋果一向要求合作夥伴嚴守秘密，加上冇講明新iPhone會叫iPhone 5，數記如果真係搶先抽水，好易激嬲蘋果，萬一唔畀你賣或者遲啲先畀你賣咁就弊嘞。