潮流興打告急牌，民調顯示白鴿黨選情告急，直選議席隨時得番兩個，要四周箍票，茅頭直指人民力量。其實除咗政治舞台，財金界都有唔少人要打告急牌︰
．伯南克要打告急牌。嚟緊星期五嘅Jackson Hole會議，假設佢放水，即係用埋最後一粒子彈，第時經濟有乜冬瓜豆腐就冇晒計仔；但唔放水則股市未必頂得住，或者會搞到奧巴馬連唔到任，之前羅姆尼又講到明，做到總統一定會炒咗伯南克……伯老睇嚟要搵狼英幫手，學吓說話偽術。
．溫家寶要打告急牌。A股2000點岌岌可危、釣魚台主權未攞得番、4萬億搞嘅豆腐渣工程開始浮面、十八大嚟緊開會……溫總應該要搵華仔、偉仔呢班影帝friends，夾手夾腳做埋幾場戲先掂。
．技術派要打告急牌。恒指50日線升穿250日線，締造終極黃金交叉；另一邊廂，10日線又跌穿20日線，形成死亡交叉。究竟信邊個交叉，真係唔叉知。
唐牛