禾琪越戰越差，但大佢成截嘅「細威」莎蓮娜就越戰越勇，前晚喺美網女單首圈對住美國同胞范德維格，輕鬆贏6:1、6:1，同家姐威廉絲齊齊晉級；至於衞冕男單嘅塞爾維亞球手迪祖高域亦贏得好易，直落3盤淘汰意大利嘅羅倫斯入次圈。（now636台今日11:00pm直播）
30歲嘅細威喺今年下半年真係弗到冇朋友，贏完溫網女單之後，再喺倫奧攞番面女單金牌。前晚佢對住范德維格，唔使1粒鐘就贏6:1、6:1，成功取得次圈入場券。呢位4號種籽賽後話：「我深信自己仍然係世上最出色嘅球手。今屆很多球手參賽，但唔係太多人夠膽話自己好勁。我唔在乎自己係咪世界排一，淨係理自己勁唔勁，同埋贏唔贏到波。」細威嘅32歲家姐威廉絲亦喺首圈晉級，以6:3、6:1淘汰另一美國球手瑪特卡。
迪祖連贏12局搞掂對手
男單方面，2號種籽嘅迪祖贏得鬼咁輕鬆，只係用咗73分鐘，就以6:1、6:0、6:1贏意大利嘅羅倫斯，比賽期間一度連贏對手12局，狀態大勇。同佢一齊出線嘅，仲包括5號種籽法國嘅泰桑高，同埋6號種籽捷克嘅貝迪治。