新民黨葉劉淑儀同自由黨劉健儀兩位阿太,次次喺港島選舉論壇針鋒相對,帶嚟唔少火花。雖然未有選舉結果,但劉健儀先勝一小仗,事關獲前立法會主席范徐麗泰押注,同佢影咗poster助選,唔知之前呻過范太變心嘅葉劉,會唔會好傷心?
呢排網上亦突然流傳一段,兩位前匯賢智庫員工大數葉劉刻薄嘅錄音,怪責葉劉用人唔使本,例如年宵晚晚凌晨先收檔,但又要佢哋朝朝九點再開工,做死人咩?葉劉透過發言人回應,兩位前員工都係自動辭職,佢仲為其中一位寫咗封好好嘅推薦信,對於佢哋嘅評論好奇怪,但有心理準備選舉期間會有抹黑,唔會介懷。