參加完倫敦奧運，牙買加「飛人」保特最近去咗曼徹斯特，捧佢愛隊曼聯場。有對新人咁啱就喺保特住嗰間酒店舉行婚禮，八八卦卦嘅保特又咁啱見到，就走咗去祝賀一對新人（圖），仲同佢哋影相、簽名留念，相信呢個婚宴都令對新人畢生難忘！保特上周六就去咗奧脫福球場，睇曼聯對富咸，嗰場紅魔有驚無險贏3:2；保特賽前就帶住3面奧運金牌，落草地同球迷見面，結果全場球迷都大叫「簽保特」！