銅鑼灣名店林立唔止吸引強國人去行街，好多藝人都鍾意喺度出現。前日就先後有三位藝人不約而同嚟咗呢度消費。首先三點幾就見到阮小儀去咗百德新街，入咗一間做緊折扣低至一折嘅時裝店，短短10分鐘就俾佢掃咗長、短袖衫各一件走人。隔咗冇耐又見到劉嘉玲同助手現身同一條街另一間時裝店，見嘉玲喺度左睇右睇，入完試身室之後，冇耐出嚟就簽單走人，前後都係唔使10分鐘。一身貴氣嘅嘉玲出到嚟上車，仲好有禮貌同記者say hi，呢啲咪星囉！
Do姐賺免費泊車
有人話女人錢易賺，但世事冇絕對，轉過頭喺利園商場嘅Cova餐廳，見到知慳識儉嘅鄭裕玲（Do姐）同助手喺度買西餅，只見化淡妝冇戴黑超嘅Do姐，手指指咁叫個店員幫佢夾蛋糕，跟住就由助手畀錢兼攞走。臨落停車場前，Do姐仲去埋顧客服務部搞埋免費泊車至走。又係喎，不用白不用，冇理由益啲地產霸權㗎，Do姐好嘢。
採訪、攝影：吳耀輝
