家「CoCo Park」購物公園北園的確幾熱鬧，每個星期五、六都好似市集咁，旺到無人信，夜少少分分鐘行都行唔到，你話香港蘭桂坊熱鬧咩？呢度都一樣喎！好似今次為大家介紹呢間上樓吧，「O! Garden」（後花園酒吧）就經常爆到瀉！文、攝：小馬
呢間場開喺露天位置，場面裝潢都幾靚，大家除咗飲吓酒之餘，仲可以欣賞吓附近夜景，鍾意的話，抬起頭一樣可以睇到繁星閃閃。呢度經常都全場爆滿，即使閒日都有成七、八成客！人多熱鬧，仲要有些少逼，嗰種摩肩擦踵嘅感覺，真係識蒲嘅朋友一定鍾意，唔係煩，係熱鬧同有氣氛！而且呢度班客人係乜嘢類型都有，以外國人同埋海歸派就最多，簡直感受到外國酒吧嘅氛圍。
呢度靚女多，雖然絕對係其中一個吸引人之處，但係個人認為，派對多、節目精采更加係主打賣點。唔係吹水，真係差不多每個星期都有嘢搞，而且次次唔同主題，好似啱啱過去嘅星期就玩咗比堅尼派對，一大班香艷靚女，同埋着三點式嘅女郎通處走，不停經過我身邊，嗰種俾女圍嘅感覺，超正！呢度多節目，加埋一班好識搞氣氛嘅女DJ，星期六去蒲，真係勁好玩！即使有時場方面無安排派對，客人都會自發性玩起小型派對，熱鬧到暈。價錢方面，前排做緊嘅優惠有十點前Cocktail任斟任飲，唔知呢個星期仲有無咁抵。不過，無所謂啦！靚女、音樂、氣氛，仲有露天位，去蒲想要嘅嘢，呢度有齊晒，就算酒水逐支計，都值得去玩吓啦！
O! Garden（後花園酒吧）地址：深圳市福田區民田路138號購物公園北園3樓