約半個月前無綫爆出竊錄疑雲，流出幾張方逸華、樂易玲等高層被偷拍嘅相，有前員工指控無綫懷疑偷裝隱蔽鏡頭監察員工活動，搞到無綫一陣白色恐怖，噚日馮仁昭再收到讀者爆料，竊錄疑雲續集上演，今次仲有片有聲㖭。
「只有人鬧TVB」
其中一條片係黑白畫面，相信係裝喺身上偷錄，拍片人急步搭升降機直踩六嬸方逸華辦公室找佢晦氣咁款，旁邊就有女職員實，聽到六嬸話：「拎去畀TVB啦，我唔管呢啲嘢㗎，呢啲嘢我唔理㗎，因為我好多嘢做。」另外有一條聲有個疑似管理層對嚟投訴嘅員工講：「如果阿Sir要我看廁所我都要看，我係跟番我合約做，我係尊重我嘅合約。」再另一條聲則有人話：「從來都只有人鬧TVB嘅啫，好少人讚TVB㗎老實講。」
對於咁盜錄係咪犯法，黃國桐律師就話要視乎有冇洩露商業機密，件事最奇係報料者話係孫耀威當日護車禍受傷嘅女友陳美詩而偷錄，但啲片同聲都冇孫耀威出現過，馮仁昭打電話問老孫，佢哈哈大笑話：「好假好搞笑，邊個咁大整蠱？我好耐冇入無綫，未見過方小姐，唔鍾意同人嘈，點會偷拍咁無聊。」