一人一票民選香港小姐最終爛尾，全城鬧爆之餘更連日本都報道有關事件，可說是電視史上一大笑話，截至昨日無綫及通訊事務管理局合共收得763宗投訴，破盡紀錄。無綫前總經理陳志雲昨日更坦言對事件感到心痛。
新一屆香港小姐大前日誕生，原本無綫首推一人一票民選香港小姐，豈料最後民選不成爛尾賴黑客，最慘是全城插爆之餘，原來醜事已揚海外，就連日本雅虎都以日文轉載香港關於無綫今次瘀爆的報道。
無綫由前晚開始至昨午已累積得116個電郵及電話投訴，通訊事務管理局則累積647宗投訴，即兩方面合共有763宗投訴。不過無綫已表示不會重選，冠軍張名雅、亞軍黃心穎、季軍朱千雪及最上鏡小姐岑杏賢昨日先到將軍澳電視廣播城接受無綫行政主席梁乃鵬頒發獎金，緊接再到尖沙嘴領獎。
張名雅撐到底
張名雅力撐自己實至名歸，但講到舅公張堅庭讚朱千雪，張名雅說：「佢啱啱喺外國返香港，都冇睇當晚比賽，咁即係我唔係靠關係攞冠軍啦。」被張堅庭大讚笑得甜的朱千雪亦開心表示多謝他，又強調大家都靚。有傳無綫補償她與劉德華拍劇，朱千雪即說：「唔係補償，係個個都想同華仔合作。」
無綫前總經理陳志雲昨日到銅鑼灣出席雜誌活動，提到港姐搞到一鑊泡，他說：「好心痛，無論觀眾同TVB都冇人想件事出現，自己唔啱位置批評，我相信TVB會考慮各方面，冇人想將聲譽及宣傳作賭注。」提到誰人需要負責時，志雲表示問題如政治問責，相信TVB會處理，他亦無意評論余詠珊的工作表現。
何麗全嘆可惜
對於無綫的節目接二連三被批評，如《玩轉三周1/2》被狂轟抄襲，志雲語帶相關說：「參考人哋製作無可厚非，製作團隊會預計到意念嘅嘢都係你撞我我撞你，參考唔係壞事，唔好就改進做到一百分。」
同場的何麗全對今次事件表示可惜，他說：「香港先生都做過電話同網上投票，只係規模冇咁大，港姐矚目啲，有名車好吸引，我冇投，我驚中咗架車。」
採訪：黃曉妍、王崇穎、黃曉程
攝影：林德雄、黃文偉、朱志聰