香港所謂嘅日式放題，食物選擇唔多，仲要漏單份量少，食完更加一肚氣。都係北上好，地方大坐得舒服，食物選擇多仲要係貴價貨，擺低百零蚊就保證捧住個肚落樓，呢啲先係放題吖嘛。文、攝：中行線
《吃喝玩直樂》先唔講啲乜，內地勝在地方多，「萬膳」面積有成12,000呎，九成都係要除鞋入座嘅寬敞和式座位，附設軟綿綿絲絨梳化椅，可以伸長腳仔坐，飽飽哋飯氣攻心，伸個懶腰都仲得，畀着喺寸金尺土嘅香港，擺枱擺到逼一逼，動作大啲都背脊撞背脊，一個唔覺意，隔籬位分分鐘食你批踭。
即叫即開夠新鮮
另一樣要讚嘅係超大落地玻璃，日頭陽光射入店舖，一派懶洋洋，夜晚又可以睇吓街景，感覺點都比香港啲密室型上樓舖開揚得多。數座位，全場可以同時容納250人，另有12間4至32人VIP房，以木色為裝修主調，枱與枱之間只用木製小屏風分隔，踩嘅係水泥地板，抬頭望到嘅係純白天花板，裝修簡約唔浮誇，無話懶金碧輝煌雕龍雕鳳，食餐飯都舒服啲。食物選擇方面，各式手握壽司、鍋物、炸物、刺身固然任食唔嬲，不過建議一件起、兩件止，唔係唔好味，而係要留番個肚食冰島生蠔，經理拍晒心口話：「老闆係香港人，知道香港人識食，生蠔即叫即開，保證新鮮。」我試過，果然海水味濃凉透心，正！二位以上即送海膽一板，一啖吞入口，又係鮮到無嘢好講。
女師傅功架十足
鐵板吧枱不時傳來火光熊熊，但見女師傅阿喜手起鏟落，見佢密密手忙個不停，原來整緊一客鵝肝多士，「鵝肝都有得食？」無錯，放題有鐵板燒已經夠特別，仲要有即叫即燒貴鵝肝，百零蚊放題，有生蠔、有鵝肝，香港邊度有咁平？而且就算係牛柳粒，佢哋都係用安格斯牛，齋講無用，食客一定食得出。
畀埋貼士：燒帶子必食
燒安格斯牛柳粒、鵝肝多士、串燒大蝦、燒腩肉嗰陣，兩隻鐵鏟發出清脆叮叮聲，中看又中吃，阿喜畀貼士：「黑殼帶子北海燒，幾乎每枱必點。」收到，呢餐飽咯。萬膳地址：深圳市羅湖區春風路3068號置地廣場2樓東側電話：（86）755-2290 0992收費：午市（11:30am-3:00pm)￥128，晚市（5:30pm-11:30pm）￥188