讀者Thomas再度來電郵指油麻地果欄應該拆除，政府官員不能對現狀視若無睹，直至有大意外發生先至去視察。讀者T請勿勞氣，林鄭月娥在花園街發生攤檔大火之前，有冇去過花園街視察、關注情況呀？政府有大把嘢要做，拆卸重建油麻地果欄肯定不在優先表（priority list）之內。可以咁講，政府幾時話要遷移油麻地果欄，必定好快就有一啲集體回憶關注組走出來抗議，指控政府破壞本土文化，煩到政府要死，既然暫時無事，就無謂點燃火頭啦。
小思大姐對灣仔有難以磨滅嘅個人回憶，不斷搜尋灣仔老照片。前星期小思非常有心，電郵傳來一張灣仔軒尼詩道老照片，時維1950年代與1960年代中期之間嘅軒尼詩道一景，照片清晰可見當時一啲舖頭嘅招牌，包括湛記燒臘家、新新書局、新華汽車行、廣和酒莊、頤園大酒樓等。左丁山搵幾位灣仔老街坊睇過張照片，佢地話湛記燒臘所在地應該就是今天的創興銀行軒尼詩道分行。
2012年之灣仔與1962年之灣仔，自然有巨大差別，當年路上經常只有三數輛汽車行駛，與今天整日車龍不絕嘅情況，難以相比，遙想當年，路上汽車少，海邊又近（六國飯店對開），相信空氣一定好好，唔會係今日「路邊監測站錄得空氣污染甚高」嘅情況！餐飲L則自溫哥華探親回來，去中環食午飯，適逢路邊監察站污染指數達到190以上，令佢好唔舒服，佢嘆一聲：「唉吔，在溫哥華吸啖新鮮空氣，好似可以直落丹田，精神為之一振，人都爽晒，與中環相差太遠咯，唔怪得見到班親友，人人都面色好好！」
香港想有溫哥華之空氣？難矣哉，無謂大想頭，如要一試，不如移民！餐飲L十年前去溫哥華，猶有朋友問佢肯唔肯買象拔蚌海鮮來港出售，佢話不熟不做都係咪制。今次去到，順口問吓朋友象拔蚌行情，朋友話：「生意好到不得了，多多都唔夠賣，同你咁老友，即使你要貨，我都冇貨賣俾你呢，中國大陸入口商之訂單，大得驚人，又肯俾好價錢，我地仲邊度想做香港生意呀，你想食正宗加拿大海產，近近地飛去上海啦！我個仔本來只係讀英文，我依家逼佢學普通話呀！」餐飲L慨嘆強國人之飲食習慣，正在改變環球食物供應鏈，佢驚住十年後西班牙都冇酒賣俾佢。