張敏退出娛圈近10年，原來一直有電影商找她演出，但因她轉行做生意，故把電影和電視合約推掉，不過最近她開始蠢蠢欲動，她日前說：「如果有好劇本，我會接拍電影，當然大前提係唔可以影響家庭生活，如果有好嘅電影項目，我可以做埋投資。」
張敏坦言開始有些技癢了，她說：「有時喺屋企睇電視，睇番自己嘅舊作《賭神》、《賭聖》同《逃學威龍》呀，我會好感恩當年可以同咁多好演員如發哥、華仔同星仔合作拍戲，如果時間許可，又遇到好嘅劇本，我都可能會以玩票性質再出山拍番戲，如果有廣告同商演搵我，時間啱咪做囉！家我間中都會做吓慈善嘢，又或者去做義工，我覺得都幾有意思。」
與未婚夫製作電影
將來張敏不但想復出幕前，還想嘗試做幕後工作，她解釋：「我未婚夫都做過娛樂圈，佢人脈都唔錯，如果我加埋佢要搞啲好戲出嚟，應該會有可為，所以我都幾有興趣搞吓電影製作，拍啲有意思嘅電影畀觀眾睇。呢幾日我哋都傾過復出娛樂圈嘅事，佢冇反對，佢話只要我喜歡，佢就會支持我嘅決定，最重要係我開心。」