噚日最令Sarah感動嘅，就係見到中一班導師兼體育老師高麗珊。老師大爆Sarah中一時仲肥過家陣，但係活潑、開朗、乖巧、愛笑嘅性格就一啲都無變；佢仲話，母校梁式芝書院考慮將新班房以「李慧詩」命名，將呢個奧運獎牌光榮喺學校永留記憶。
高老師係Sarah嘅恩人，事關Sarah讀中三時，就係高老師幫佢報名參加單車總會嘅「明日之星」培訓班；佢話梁式芝喺下周一嘅新學期「開學禮」，會將Sarah奧運得獎片段同以前喺中學嘅回憶，以影片形式全校播放同張貼。佢話：「我哋希望將Sarah嗰種堅毅嘅精神介紹畀同學，佢對運動有熱誠外，讀書都係中上等級，好值得師妹學習。」
06多哈亞運團體佩劍銅牌嘅歐陽慧心同徐韻怡，都係梁式芝學生，今次Sarah仲喺奧運拎到銅牌，難怪高老師已約定佢12月12號參加校運會做頒獎嘉賓呢！