一講到放無薪假縮皮，即刻諗起國泰航空（293），但原來金魚缸冇水，證券行都要借呢條橋嚟用。聽聞，時富證券正考慮要求幾位高層自願放無薪假，最長要放兩個月。
港股成交咁奀，噚日連400億都冇，華資證券行個餅已經越來越細，但佣金就越鬥越離譜，四年間由5蚊劈到3.68蚊，兼送免佣券，等於免費咁滯，有啲一直堅持唔減佣嘅證券行唔想流失啲客，無可奈何都要平埋一份。
經紀兼職 麻雀館戥腳
啱啱推出「一開十」即日孖展優惠嘅時富，據講打算同時向高層開刀，要求幾位高層放無薪假，有啲下個月開始放，最長放兩個月，咁長時間，真係玩轉成個南美都得。
有證券行高層聽見時富用到呢招都冇乜反應，指扣埋輪證，家陣每日成交仲衰過沙士嗰陣，最慘係見唔到隧道口嘅一點光，都唔知衰到幾時。查實好多本地證券行都喺度諗計縮皮，出到無薪假呢招一啲都唔奇，共度時艱吖嘛。
高層放無薪假已經算係咁，經紀收入同個市掛鈎，好多經紀要做多兩份工呀。除咗收市轉揸的士同網上賣嘢，新近聽到一啲經紀收市後，走去麻雀館做戥腳，人工好到隨時變成正職都得。「一枱麻雀，有齊四隻腳已經有得打，對住部大利市機，沽貨都冇人接啦！」你話幾咁欷歔。
李華華
mailto:[email protected]