《爽報》「300萬爽組合」6位參賽者，火燎森用咗九成資金買重比亞迪（1211），好明顯冇聽人教話唔好將所有雞蛋放喺同一個籃度，結果7月中輸夠40%率先被叮走。肥仔孫柏文個組合輸緊33.4%，睇嚟都就快走得。《爽報》請咗兩位「燈神」交流吓點燈心得。
火燎森30歲左右已經有車有樓有舖頭，依然堅信冇買錯比亞迪，「我唔覺得我信錯畢菲特，係信遲咗，佢8蚊入，我遲咗……」冇錯，佢真係遲咗好多，入市價介乎20.8至25.7蚊。
等緊股神入貨價
比亞迪噚日收報13.36蚊，火燎森認為跌到8蚊左近就可以入，「你用最接近股神嘅價錢買，照道理，幾年後係會有唔錯嘅回報！」呢啲咪就係Die Hard Fans囉！
至於孫柏文，佢爽組合內有沽空滙控（005），呢個投資決定成績一般，但佢繼續叫人沽滙控，事關洗黑錢單嘢最後要撥備幾多都未知，冇人知滙控將來跌幾多喎。不過話明兩位係「燈神」，聽吓好喇。