now暫時仲未斟掂意甲嘅直播權，不過，今周就有新搞作──復播巴甲，而頭炮就係周六凌晨直播嘅彭美拉斯對甘美奧，之後每個星期都有，球迷可以睇施多夫、法比安奴同細哨朗拿甸奴等球星喺巴西嘅表現。now Sports頻道副總裁賴汝正噚日證實，過去喺Goal TV播嘅英冠，因雙方傾唔掂，今季就冇得睇；但佢哋買咗英格蘭足總盃未來3季嘅播映權，連埋英格蘭聯賽盃，應照顧到球迷需要啦。