專家成日教我哋，睇一間上市公司最緊要睇現金流。因為核數師查數，假單、假交易未必check到，但現金水平總是最難做手腳。不過，時代已經進步了，今時今日上市公司就連現金都可以造假！要存心呃你，總有層出不窮的蠱惑橋諗到出嚟。
原本根據監管要求，核數師係需要親自向銀行攞有關上市公司嘅交易、賬戶等各方面的確認信，唔可以透過中間人，以防有人從中出蠱惑。不過有會計界人士就同海迪講，盛傳嗰間破天荒上市唔夠幾個月就俾人停牌嘅工業股，就曾經出過騎呢招。當佢核數師返大陸，要去建設銀行攞公司嘅confirmation時，公司嘅人話佢咁啱有事都要去銀行，就帶個核數師一齊去咗幢建設銀行大廈，核數師不虞有詐一同上去。但誰知幢樓係堅，但個office就係假，原來嗰間蠱惑上市公司，早已經喺建設銀行大廈裏面租咗一層，請幾個老臨扮銀行職員，假扮建行自己同核數師deal！而真正嘅建行其實喺其他樓層。
當然，核數師自己應該要醒目，如果一有懷疑就要搞清楚，唔好咁易上當。但呢件事亦反映上市公司為咗造假，其實有好多漏洞可以鑽，令人防不勝防。
海迪