日本國腳香川真司上周對富咸，射入加盟紅魔以來嘅首個入球，加上呢兩場發揮理想，已經成為費格遜嘅新寵。不過，香川最近接受訪問時，就大爆原來兩個人完全「唔啱channel」：「我幾乎完全聽唔明費格遜講嘅任何嘢。」睇嚟香川要喺曼聯撈得掂，真係要努力適應下爵爺啲蘇格蘭口音。另外，對富咸時大腿流晒血嘅朗尼，傷勢比想像中嚴重，據聞可能要休戰兩個月，缺席達14場比賽。