飲酒之嘛，使唔使過萬呎地方咁誇張呀？其實，樣樣都總會有一哥嘅，酒吧都唔會例外。室內面積七千多呎再加廣大嘅露天範圍，輕易成為全國最大清吧！但我更欣賞嘅，就係摸住杯底嘅望海蒲吧歲月，超正！唔講咁多嘞，「司機，唔該南山區歡樂海岸。」文、攝：吧少
所謂蘇豪區一直係潮人至愛蒲點，呢種概念內地又點會遺漏，南山區家係深圳新生代嘅蘇豪區，除咗有世界各地嘅食物專門店之外，酒吧當然唔會缺少。周末晚好想去睇曼聯踢波，因為呢支愛隊喺英超開鑼落筆打三更，以佢哋要面子嘅唔輸得性格，今場波必定好精采。
我老友真醒目，一早約定深圳蒲吧專家馬蘭奴，有佢帶路，我知道這晚一定有運行。果然，佢車咗我哋去「Eagle Bar」（老鷹吧）呢間巨無霸清吧，原來馬蘭奴蒲得多，都識得酒吧嘅王經理。反正未開波，梗係帶我哋繞場一周，了解吓間吧係大得幾咁得人驚，最後就喺露天座位吹水，望住全海景，頓時感到實在有必要嚟走一轉，呢啲先至係真真正正嘅心曠神怡！
Live Band全情投入
呢個時候音樂響起，即刻返入去室內聽Live band。王經理話佢哋個個月轉新樂隊，務求令人客享受到世界各地唔同嘅音樂。家呢個「嬲」字組合就令現場氣氛即刻升溫！來自俄羅斯嘅女歌手Kaloover唱到聲嘶力竭，我哋全情投入，搞到場英超開咗波都唔知㖭。
嘩！咁就入波㗎嘞？玩完音樂，彈琴嘅卡卡同鼓佬羅渣士立即走埋嚟，加入我哋睇波。咁大波癮嘅？「我哋係巴西人。」咁就唔怪之得啦。但點解會同個俄羅斯美女夾Band嘅？「之前蒲吧識嘅，大家一夾即合，咪齊齊玩南美、俄羅斯Crossover囉。」
Eagle Bar
地址：深圳南山區白石東路8號歡樂海岸曲水灣20棟
電話：（86）0755-8654 1082
營業時間：4pm-2am
Happy hour：4pm-8pm 啤酒買二送一
酒水收費：各款啤酒¥35/支