噚日推介嘅瑞聲科技（2018），逆市抽升逾7%，成功破頂，更一如預期獲大行齊齊唱好，其中里昂表示，瑞聲業績好過預期，反映業務進入新層次發展，透過加速自動化，競爭優勢夠強勁；定目標價31.30元，較唐牛更加樂觀。
今日推介中集安瑞科（3899），業績同樣標青，截至6月底，中期盈利3.7億人仔，按年增長47%，較去年下半年仍有近兩成進賬，反映增長勢頭良好，公司主要產銷能源、化工及液態食品嘅運輸和儲存裝備，主要客戶包括中石油（857）、中石化（386）等龍頭，天然氣在內地越來越普及，未來定單只會有增無減，母公司中集集團更係內地運輸設備供應商龍頭，實力毋庸置疑。睇估值，中集安瑞科年度化PE僅9.3倍，PB唔夠1倍，增長持續兼有息派，實在超值。放榜後股價企硬4.50元，拒絕回落，但成交依然保持，唔排除有聰明錢密密收集，現價吸納，博升一成絕不過份。
唐牛