民建聯港島區派出大佬曾鈺成同萬年老二鍾樹根出戰，前者幾乎瞓喺度都贏，後者就谷極都彈唔起。鍾樹根噚日展開上天下海宣傳，聽落係威係勢，其實「上天」只不過係租架吊雞車升自己上灣仔天橋揮吓手；「下海」就係去維港巡遊喎。鍾樹根宣傳有幾奏效不得而知，八方噚日喺灣仔半個鐘，發現市民唔多受落，有位女士行過大聲批評：「你知唔知阻晒成條街，係咪有心服務市民㗎？」另外仲有人行埋去怒罵佢支持洗腦國教出賣港人，鍾樹根就一直用個背脊「得」住人，一句都冇回應。八方覺得最不該嘅係，身為區議員嘅佢守法意識極低，架吊雞車泊喺軒尼詩道時，竟然停車冇熄匙囉。