咖喱牛腩，有辣有唔辣。牽牛同咖喱將總結每周球賽，見到抵讚嘅事，牽牛定必重重有賞，用幾百字大讚吓佢；但見到抵鬧嘅人，咖喱就會毫不留情，省佢一餐。
《咖喱篇》
做足球員都要與時並進，跟得上家嘅潮流，否則只會被淘汰。家最興嘅打法係巴塞式嘅短傳入滲，雙翼齊飛、高Q大棍、傳統442逐漸被強隊摒棄。好似曼聯同利物浦就喺今季改革，將進攻重心由邊線移到中路。
拿尼要學習做配角
費爵爺連續兩場搵香川真司打正選，上場仲將朗尼擺入後備，向外界表明佢決心改革，要用香川做核心，以後嘅進攻要由中路發動，邊線成為配角。不過，曼聯有啲球員唔慣做配角，好似係拿尼，淨係識帶住個波扭人，團體意識薄弱，完全唔啱家講求短傳配合嘅踢法，所以抵佢俾人「雪藏」。
對上兩年曼聯冇咩人用，加上係踢雙翼齊飛，冇咗拿尼就會好大劑，費爵爺先至容忍佢獨食嘅踢法，畀佢係邊線做主角；但時移勢易，家中路人才濟濟，仲點會畀你拿尼繼續喺邊線玩波！奉勸拿尼，想留隊的話，學習做配角，有時傳波比你插花過人仲實際。除咗拿尼，利記都有幾個球員要增值吓自己，好似查理阿當、佐敦軒達臣同達寧咁，如果仲跟唔上領隊羅渣士改革嘅步伐，就唔好怪人踢走你。英超踢法歐陸化已經勢在必行，作為班霸嘅球員，唔好怨隊波嘅戰術唔夾自己，而係反省下自己點解跟唔上潮流。文：咖喱