內地股市遭三面圍剿，滙豐8月製造業PMI指數跌至47.8，創9個月新低。出口疲弱，內需又谷唔起，廠家叫苦連天，近排以接急單吊命。另外，人行近排頻頻以「逆回購」（即放水）紓緩銀根壓力，上周二、四共逆回購3650億人仔，變相唔減準備金，市場自然唔受落。再者，內地重新啟動IPO三周年，年底前將有近百家公司的限售股解禁，股票供應大增，A股點會唔跌？
滬綜指2000關岌岌可危，就算伯南克係咁唱放水，港股都冇運行，昨日亮點得本地零售股，莎莎（178）及卓悅（653）齊漲6%，金飾股都有得升，因深圳擬放寬非戶籍人士「一簽多行」，變相每年多了410萬人來港消費。不過，「蝗蟲論」信徒唔服，表明會遊行抗爭，零售股的短期政策風險不低。
近日傳中央將取消內房限購令，消息雖未經證實，但空穴來風未必無因，可能只是時辰未到，待中央換屆完成，料出台更有力的救市措施，所謂「地產乃百業之母」，內房料率先受惠。綠城中國（3900）上半年賣出多個項目減債，負債比率由年初的149%降至94%，業績脫胎換骨，純利飆升1倍至18億人仔，加上6月獲九龍倉（004）入股，企業管治料進一步改善。昨收8.19元，跌1.8%，不妨趁低吸納。
魏力
http://www.facebook.com/2012jason