在馬場識馬迷S咁多年，依家先至知道佢識講日文，問佢到那裏學日語，馬迷S話：「我苦學七年㗎，其間晚晚到日本領事館與日本文化協會所辦嘅日語班上堂，直至考到Level1，跟住到日本搵廠商，搵出口商多年，講日文講得多，咪有今日咁流利囉。你知啦，到日本做生意，唔講日文就永遠冇法子與日本商人建立感情與信任感，識講日文做生意容易好多。」
而今中日為釣魚台問題鬧得關係緊張，馬迷S嘅生意模式（在日本入貨，到中國沽貨）會唔會死火呀？內地人提出抵制日貨喎？馬迷S話：「你同我定，今個星期我又去東京入貨嘞，中國人最鍾意日本產品，寫明Made in Japan嘅健康食品，如果證明有效嘅，在中國簡直供不應求，只要我有辦法買到貨，價錢唔太貴嘅話，在大陸多多唔夠賣！我梗係在東京在廣東省都唔講釣魚台啦，一味講日本製造貨品就唔會惹禍上身！」
第一代保釣人講釣魚台，今天之保釣人講釣魚島，有電視台聽眾指出：「你地一個講釣魚島，一個講釣魚台，日本人只講尖閣，點樣保釣呀？」說得也是，台灣叫釣魚台，北京講釣魚島，中國人都未統一名稱，兩岸相爭，正中外人下懷，而且保釣也者，保衛也，捍衛也，但是香港人登陸釣魚台就俾日本人拘捕遣返香港，跟住日本議員登島，就冇中國公安將佢地拘捕遣返東京，現實就是日本已實質控制了釣魚台，中國無從保衛，捍衛，應該將保釣口號修改為「光復釣魚台」（台灣用語）、「解放釣魚島」（大陸用語），或者「搶番釣魚台島嶼」（香港式用語），如若不然，繼續猛嗌保釣保釣，想笑死日本人咩！
光復收復解放搶番談何容易，有人話中日終須一戰，實係未經大腦，中國今天攻打釣魚台向日本宣戰，無必勝把握，且牽動美國駐關島海空大軍，整個東北亞亂作一團，人命與經濟損失之慘重，無可估計，左丁山呢代戰後出生香港人未見過打仗，但見證過戰後貧窮，生出嚟就是「和平主義」者，反對任何戰爭，日本戰後一代，亦係聽見打仗就怕，一啲紙上談兵嘅評論員唔好亂咁噏呀！