每逢選舉，建制派都有大量抹黑攻勢招呼泛民，上屆區議會選舉期間被愛護香港力量，借港珠澳大橋同外傭居港權案件抹黑嘅公民黨，選舉前又受呢個組織「厚待」。
廉署查足八個月
近日各區又湧現抹黑單張，變本加厲嘅係，有愛護香港力量成員甚至滋擾佢哋嘅助選團成員，攞住大聲公喺佢哋身邊叫咪，日前荃灣有個女義工因此受驚，報警求助。公民黨好㷫，噚日去廉政公署舉報。黨魁梁家傑堅嬲，話上屆區選期間已經向廉署舉報㗎啦，點解查成八個月都仲係調查中？咁仲唔係變相鼓勵愛護香港力量，喺今屆立法會選舉故技重施？要喺港島區以第七席入局嘅陳淑莊，噚日就冇跟大隊去廉署；反而朝早去咗中環，為會計界老友梁繼昌拉票，希望老友打低「梁粉」對手，殺入立法會抗狼。