內地確實係叻，淨係「地大人多」四個字已經夠晒你冷，深圳「Cosplay Cafe」佔地過千呎，閒時閒候都有半打女僕企喺門口同你講：「歡迎光臨。」把聲仲甜到漏。
文、攝：中行線
「Cosplay Cafe」開喺人流極旺嘅東門「中威商業廣場」，店外熙來攘往，但一玻璃幕牆之隔就變成宅男消磨時間好天地；地方夠大，可以擺到二十張四人餐枱、十張二人餐枱，枱與枱之間留有距離，唔使驚講嘢大聲啲都俾隔籬枱聽到。座位擺放有空間感，永無背脊撞背脊或被迫你眼望我眼嘅侷促情況出現。
一場來到，身水身汗，梗係揀張梳化椅坐坐，望一望枱面，有張顧客意見調查表，黑白印製，上面有個兔仔頭餐廳Logo，線條簡單幾Cute，如果彩色印製會更好。
女僕夠清純
坐定定，眼睛自不然擺喺一眾女僕身上，第一個感覺係──青春，真可愛青春！女僕們個個二十歲出頭，薄施脂粉到幾近素顏；講真，唔算超靚，但勝在非常清純。
一身企領純黑女僕裙，着長襪加皮鞋，外罩白色圍裙，圍裙喺背後綁結，講造型真係有九成似日本漫畫裏面嘅嬌俏女傭，我唔係宅男都覺得好好睇，亦非常啱睇。
呢班女僕全部講普通話，雖然廣東話半桶水，識聽唔多識講，但肢體言語搭夠，唔使驚溝通唔到。一坐低，佢哋就會主動埋枱招呼你，「先生，你要吃點甚麼？」 「先生，試不試我們的意粉？」 「先生，這個飲品蠻不錯的。」真係講句嘢都零舍甜過人，尤其係燦爛笑容，真係一眾港女難尋，如果可以學番三兩句日文充撐吓場面，就更加似模似樣嘞。
仲有一樣嘢，我諗所有宅男都會好鍾意，就係班女僕可以任影唔嬲，只要遞出相機，指指自己，又指指佢哋，佢哋就會乖乖企好同你影番幅合照留念。喂，笑住影㗎！當然，人哋陪你影相就可以，但請別多手多腳，切勿有過份身體接觸。
喬靖夫好紅
同女僕影完相，又到睇漫畫時間，Cafe藏書量都幾豐富，一個個木櫃、木架塞到滿，本本漫畫都九成新，無話甩皮甩骨；你知啦，漫畫迷最怕啲漫畫又殘又舊，霉霉爛爛拎上手，睇書心情會大打折扣。
書種方面，《頭文字D》、《網球王子》、《Angel Heart》、《聖鬥士星矢》、《One Piece》、《天上天下》、《吸血鬼騎士》呢類大路漫畫齊全，有時間的話，早啲嚟揀個靚位，Order番杯嘢，一次過睇晒全套一至四十六期《火鳳燎原》，真係有排Hea。
估佢唔到嘅係原來喬靖夫喺深圳都好受歡迎，作品《武道狂之詩》好多人追睇，揭兩揭，又真係畫得唔錯，故事脈絡亦好忠於原著小說，抵佢紅。
必吃意粉夠飽肚
無錯，只要有幫襯，話之你淨係飲杯嘢，理論上都可以由開門睇漫畫睇到打烊，但一日三餐都要搵着落㗎。Cafe提供食物種類算多，由三文治、沙律、漢堡、串燒、意粉、各式冷熱飲品都有，收費亦算合理。
女僕話：「這裏的飲品，冷飲好喝過熱飲。」信佢，我點咗杯青蘋果乳酸特飲，顏色好靚，入口酸多過甜，喺家動輒攝氏三十幾度高溫天氣下呷一口，簡直凉透心。
值得推介食物有扒芒果火腿三文治，係，初頭見到菜名，我都覺得有啲騎呢，心諗：「想點呀？三文治同芒果搞埋一碟，理應唔多Match喎！」但試過又真係幾好味。穩穩陣陣飽肚之選，有拿破崙意粉，女僕一拎上枱，我不禁嘩咗一聲，使唔使咁大碟呀？仲要勁多火腿同煙肉，味道香濃，係港人食慣嘅口味，份量之多，兩個人Share都得呀！
Cosplay Cafe
地址：羅湖東門人民北路1008號中威商業廣場B1樓A號舖
電話：（86）0755-8220 8963