新東19張名單大混戰，選舉論壇亂到七彩。喺咁多位冷門候選人中，八方覺得龐一鳴相當有heart。標榜身體力行反地產霸權、支持環保嘅佢，每塊banner都係自家製，正當各候選人日日喺火車站「派早餐」，龐一鳴就相當食腦，喺單車徑掛banner，希望踩單車嘅車友可以送佢入立法會。佢前日去完港台選舉論壇後，就喺火炭單車徑現身，佢話支持者蔡東豪遲吓會幫佢拍短片宣傳，希望喺選情上有突破，至少打低同姓龐愛蘭，少個建制派都好呀。