【記者伍雅謙報道】罕見遺傳病威爾遜氏症，令從前活潑少女梁慧明Coby，變成癱瘓病人。不再美麗，不能走動 ，害怕別人嫌棄目光，自卑的她緊閉心扉，隱蔽家中。好媽媽不離不棄照料，令慧明好不容易踏出第一步，抬起頭、挺着胸，走出封閉世界。她渴望社會人士給她一個重塑生命的機會。威爾遜氏症會令患者身體無法排出銅質，須長期服去銅藥避免肝衰竭。去年6月慧明發病，不但出現肝硬化，更銅質上腦，腦神經嚴重受損致癱瘓。
兩手可輕微活動
失去自顧能力，慧明有如襁褓中的嬰兒，需全天候照料。梁媽媽每朝五點起床，開糊仔、換片、刷牙、煮粥。「好似湊BB咁，由頭嚟過，佢細個我都冇咁辛苦，家去邊都要搵媽咪，壓力好大」。慧明吞嚥困難，初時一路餵食，食物一路從嘴邊流出來。梁太慼慼然說：「忟到忍唔住打佢，心諗點解你會搞成咁，原本好活潑，每日返工，又拍緊拖，家乜都冇。」她晚晚失眠，胡思亂想：「諗自己一旦唔係度，個女點？」慧明病發前任船務文員，性格活潑開朗，嘴邊常掛笑容。「佢好貪靚，鍾意扮靚化妝。」癱瘓後整個人走了樣，頭部經常「側埋一邊」，感覺異樣，「佢唔肯出街，姑姐同朋友嚟探佢，嚟到樓下，佢都話唔想見，勸咗好耐都唔聽」。其實梁太十分理解女兒內心的苦澀，「我同佢出街，自己都好唔自在，怕被人指指點點，落街買嘢會耷低個頭，唔敢望人」。幸而慧明身邊有一大班親友支持：同患此病的姊姊、捐肝救她的表妹、不離不棄的父母，還有知心好友，令她漸漸打開心扉。加上接受職業及物理治療後，由身體不能動彈，到雙手可輕微活動，讓她重燃人生希望。不再自困的慧明，用盡力氣向媽媽說：「去……飲……茶……咯！」梁太意識到，女兒願意勇敢踏出第一步面對人群：「佢都肯，我做阿媽點解唔鼓勵佢？我同佢講，如果啲人望你，媽咪鬧佢，你抬起個頭唔使驚！」梁太除加緊為女兒按摩手腳做復康運動，更經常給她鏡子 ，「我提醒佢留意自己個頭，唔好成日歪埋一邊」，慧明不再抗拒照鏡。近月她的進步更見明顯，母女對康復充滿信心。為了女兒，捱至腰骨勞損的梁太忘我地說：「我樣樣輸得起，就係輸唔起個女！」