港交所（388）喺中環交易廣場嘅展覽廳開埋今個星期就閂門，唔係港交所畀唔起租（167億買起倫敦金屬交易所都冇問題啦），而係搞裝修，年底裝修完，上市儀式可以搬落展覽廳搞，地方闊落啲。港交所舊年先同業主續約，繼續租用交易大堂個位，之後就開始諗諗點樣用盡啲地方。家展覽廳部份有個多功能房，但最多只係坐到170人，港交所開股東會都要喺房外加椅。港交所打算將房門改為活動門，第日搞股東會或者租場畀人搞研討會，可以開晒啲門，地方大啲，租都可以收多啲。此外，家陣上市儀式喺一樓搞，地方相對窄，港交所諗住將展覽廳嘅展覽部份重新設計，第日上市儀式可以搬落去搞，地方大好多，唔使成大班人逼埋一齊。查實啲展覽擺設擺咗喺度六年咁耐，感覺開始老套，都係時候換一換佢。