最估唔到：修咸頓
冇期望唔會失望，所以上周六兩支打敗仗嘅英超主隊，對維拉冇感覺，對推介嘅修咸頓主場吞兩蛋感沮喪，後者上下半場各一次中楣，冇計；但有兩樣事情賽前估唔到，一係球會闊別英超7年後首次主場登場，聖瑪莉球場竟然空櫈密佈，只有9成入座率，氣勢已減；另英國全日大雨持續，啱晒成日用嚟打欖球嘅JJB爛場嘅韋根發揮。修頓下戰聯賽主場迎紅魔，仲入唔到波？
下次再追：紐卡素
車仔嘅厲害在於3連捷有兩場係勒住贏，令紐記擁黑雙煞去到倫敦作客都冇晒威力；季初好難同車仔作對，禮拜五踢歐超盃鬥馬體會，想唔繼續熱爆都幾難。紐記，仍可睇好，下周日返主場鬥有排執嘅維拉，盡情發洩吧！
不值再捧：昆士柏流浪
昆士柏（圖藍白衫）豪氣買一大班過氣英超兵嚟撐場，想打入前10，小弟暫時唔信，上周六作客諾域治攞到今季第1分算執身彩；熱刺中堅戴臣臨崖勒馬，唔肯過檔，呢班波仲用安頓費迪南守住後方，必成眾英超射手嘅甜心。昆仔下場聯賽作客曼城，上季煞科已送個3:2兼一個聯賽冠軍畀對手，人家今季都唔會同你客氣喎！
大膽甜心：飛腳、阿積士
貼歐洲波失手，上周六推介唯一較安慰係日聯，飛腳果然返嚟，炒岡薩多7:2，班波追緊得失球，有前冇後，下次作客砂岩都唔同佢客氣，總入球4-6球掃射。阿積士，真係冇得頂，年年走幾件，仍然係荷甲霸者，近兩場入11球；阿仙奴，學吓嘢啦！
勁爆冠1：黑池
之前講過有幾隊英冠隊，晨咁早喺英聯盃第1圈就收工，唔通留力打英冠？結果黑池同白禮頓上周六主場狂數，開開心心迎接周中假期，毋須參戰第2圈賽事；其中「1哥」黑池仲有幾件包括恩斯個仔，畀英超隊撬緊，如果維持到家嘅人腳，應屬爭升要角。
蘋果波神