曾捐助100萬元支持梁振英參選特首，發表撐梁公開信，並在幾份主要報章登廣告支持延長交易時間的耀才證券（1428）主席葉茂林，可說是財經界另類人物，日前睇地產新聞，見有內地投資者買入油麻地前稱「數碼講」商場的金勳大廈地下連閣樓舖位僅兩個多月，即獲葉茂林以個人名義斥資1.8億元接貨。兩個月賺4000萬元，真係恨死唔少人。據報道，此物業屬於人流極少的「死場」，咁都高價掃入，所為何事？翻查一個月前本報專訪，呢位證券行老闆聲稱看淡今明兩年股市及樓市，更說已盡沽所持投資物業。睇淡理據是歐債問題未解決，但樓價已升至天棚價，又認為美國會提早於今年底或明年初加息，樓市會大跌喎。呢位奇人，出資支持全城鬧爆的梁振英選特首，已經禍港殃民，再來支持延長交易時間，又被同行杯葛。佢上月睇淡樓市，現在當然證明是錯到離譜，而且講一套做一套，果然同梁特首一樣，聽佢分析投資股樓，中毒機會大過得益，真係信佢一成都雙目失明。
昆能績佳 不妨儲貨
早前提及華油能源（1251）突然獲光大控股（165）旗下私募基金買入其可換股債券（CB），據講該公司已於剛過去的周末，帶團做實地探訪，讓新聞界及投資界認識，本周亦有其他路演，看來會有大搞作。另外，昆侖能源（135）上周四公佈的業績優於市場預期，有大行率先出報告提高目標價，如果今日跌市低開，可以考慮儲少少貨等升。歐陽風